उपकुलपति कप राष्ट्रिय खेलकुद प्रतियोगिता २०८२

त्रिभुवन विश्वविद्यालयका आङ्गीक क्याम्पसहरूबीच मिति २०८२ साल माघ १४ गतेदेखि उपकुलपति कप प्रतियोगिता २०८२ सञ्चालन हुने व्यहोरा सम्बन्धित सबैको जानकारीका लागि सूचित गरिन्छ। उक्त प्रतियोगिता त्रिभुवन विश्वविद्यालय, शिक्षाध्यक्षको कार्यालय अन्तर्गत विद्यार्थी कल्याण तथा खेलकुद निर्देशनालय (SWSD) को समन्वयमा आयोजना गरिनेछ।

उपकुलपति कप प्रतियोगिताबाट विभिन्न खेल विधामा प्रतिभावान विद्यार्थी खेलाडीहरू छनोट गरी बन्द प्रशिक्षण सञ्चालन गरिने र सो प्रशिक्षणबाट छनोट भएका खेलाडीहरूलाई विश्वविद्यालयस्तरीय तेस्रो राष्ट्रिय खेलकुद प्रतियोगिता २०८२ मा त्रिभुवन विश्वविद्यालयको तर्फबाट सहभागिता गराइनेछ।

समावेश गरिएका खेल विधा तथा संख्या:

१. भलिबल (पुरुष/महिला): १०/१० जना खेलाडी र १/१ जना प्रशिक्षक

२. ब्याडमिन्टन (पुरुष/महिला – सिंगल/डबल): २/२ जना खेलाडी र १ जना प्रशिक्षक

३. टेबल टेनिस (पुरुष/महिला – सिंगल/डबल): २/२ जना खेलाडी र १ जना प्रशिक्षक

४. एथलेटिक्स (पुरुष/महिला): ४/४ जना खेलाडी र १ जना प्रशिक्षक

• ट्र्याक इभेन्ट: १०० मि., २०० मि., ४०० मि., ८०० मि. दौड

• फिल्ड इभेन्ट: लङ जम्प र सटपुट

५. बास्केटबल (पुरुष/महिला) (३x३): ५/५ जना खेलाडी र १ जना प्रशिक्षक

६. टोली नेता (टिम म्यानेजर): १ जना

सहभागिता सम्बन्धी नियम:

• एथलेटिक्सतर्फ एक खेलाडीले दुई वटा ट्र्याक इभेन्ट र एउटा फिल्ड इभेन्ट वा दुई वटा फिल्ड इभेन्ट र एउटा ट्र्याक इभेन्ट मा सहभागिता जनाउन सक्नेछ।

• एक खेलाडीले एक मात्र खेल विधामा सहभागिता जनाउन पाउनेछ।

• खेलाडी वा टोलीले सम्बन्धित आङ्गीक क्याम्पसबाट प्रमाणित अनुसूची–१ फारम भरी आवेदन दिनुपर्नेछ।

आवेदन प्रक्रिया:

योग्य खेलाडी वा टोलीले अनुसूची–१ फारम सम्बन्धित क्याम्पसबाट प्रमाणित गराई प्रत्यक्ष वा इमेलमार्फत आवेदन दिन सक्नेछन्।

इमेल: swss@tribhuvan-univesity.edu.np, info.swsd@tu.edu.np

अन्तिम मिति: २०८२/१०/१० गते अपराह्न ४:०० बजेसम्म

उपकुलपति कप राष्ट्रिय खेलकुद प्रतियोगिता २०८२ को विस्तृत कार्यक्रम तालिका पछि प्रकाशन गरिनेछ।

यस सूचनालाई सबै सम्बन्धित निकाय तथा आङ्गीक क्याम्पसहरूमा जानकारीका लागि अनुरोध गरिन्छ।

थप जानकारीका लागि:

विद्यार्थी कल्याण तथा खेलकुद निर्देशनालय, शिक्षाध्यक्षको कार्यालय, त्रिभुवन विश्वविद्यालय

https://swsd.tu.edu.np/

त्रिभुवन विश्वविद्यालयले तेस्रो विश्वविद्यालय कप राष्ट्रिय खेलकुद प्रतियोगितामा उत्कृष्ट प्रदर्शन गर्दै लगातार तेस्रो पटक प्रथम स्थान हासिल गरी प्रतिष्ठित रनिङ शिल्ड आफ्नो नाममा सुरक्षित गरेको छ। प्रतियोगितामा विश्वविद्यालयका खेलाडीहरूले विभिन्न विधामा १८ स्वर्ण, ६ रजत र १ कास्य पदक जित्दै आफ्नो क्षमता प्रदर्शन गरेका छन्।
एथलेटिक्समा आदेश कुमार यादवले १०० मिटर र २०० मिटर दौडमा स्वर्ण जितेका छन् भने अमरनाथ साहले ४०० मिटरमा स्वर्ण हासिल गरे। सुशील के.सी.ले लङ जम्पमा रजत र १०० मिटर दौडमा कास्य जितेका छन्। रमिता कुमारी थारुले २०० मिटर र ४०० मिटर दौडमा स्वर्ण जितेकी छन् भने सिमा कुमारी चौधरीले १०० मिटर र लङ जम्पमा स्वर्ण तथा २०० मिटरमा रजत पदक प्राप्त गरेकी छन्।
ब्याडमिन्टनमा क्षितिज खनालले सिङ्गल र डबल दुबैमा स्वर्ण जितेका छन्, दीपेश मुनि बज्राचार्यले सिङ्गलमा रजत जितेका छन्। रसिला महर्जनले सिङ्गल र डबल दुबैमा स्वर्ण प्राप्त गरेकी छन् भने भावना देवी केदेमले सिङ्गलमा रजत पदक जितिन्। टेबलटेनिसमा हिमाल बिष्टले सिङ्गल र डबल दुबैमा स्वर्ण जितेका छन्, सुजन गडालले सिङ्गलमा रजत जितेका छन्। बियन्का राईले सिङ्गल र डबल दुबैमा स्वर्ण हासिल गरेकी छन् भने योङ्गी पौडेलले सिङ्गलमा रजत प्राप्त गरेकि छन्।
बास्केटबल छात्र र छात्रा तर्फ गरि २ स्वर्ण पदक प्राप्त भएको छ। छात्र विधामा अमृत कोइराला, निकेश रेखाल मगर, मनीष के.सी., सुदीप पौडेल क्षेत्री, र छात्रा विधामा रिन्छेन मोक्तान, सुहाना मल्ल, रोशनी श्रेष्ठ तथा प्रेडिका महर्जन सहभागी रहेका थिए।
भलिबलतर्फ १ स्वर्ण पदक प्राप्त भएको छ। यस टोलीमा दीपेन्द्र अवस्थी, नवीन बि.के., सायब बस्याल, लोकेश कुमार खड्का, पुकार गुरुङ, पारस बोहरा, सुरेश मल्ल, अनिश निरौला तथा सौगात न्यौपाने सहभागी रहेका थिए।
विश्वविद्यालय टोलीको सफलतामा यस अघिको त्रिभुवन विश्वविद्यालय उपकुलपति कप राष्ट्रिय खेलकुद प्रतियोगिता २०८२, त्यसपछिको उत्कृष्ट बन्द प्रशिक्षण, खेलाडी छनोट तथा व्यवस्थापनमा त्रिभुवन विश्वविद्यालय तथा खेलकुद निर्देशनालयको भुमिका महत्वपूर्ण रहेको विश्वविद्यालयले जनाएको छ। लगातार तीन संस्करणमा च्याम्पियन बन्दै त्रिभुवन विश्वविद्यालयले विश्वविद्यालय खेलकुद क्षेत्रमा आफ्नो वर्चस्व कायम राख्दै रनिङ शिल्ड समेत आफ्नो नाममा सुरक्षित गरेको छ।

त्रिवि उपकुलपति कप राष्ट्रिय खेलकुद प्रतियोगिता २०८२ भब्य रुपमा सम्पन्न, रत्न राज्य क्याम्पस प्रथम

काठमाडौँ । त्रिभुवन विश्वविद्यालयको विद्यार्थी कल्याण तथा खेलकुद निर्देशनालयद्वारा आयोजित त्रिवि उपकुलपति कप राष्ट्रिय खेलकुद प्रतियोगिता २०८२ को समापन समारोह भव्य रूपमा सम्पन्न भएको छ । २०८२ माघ १४ देखि १८ गतेसम्म काठमाडौँमा सञ्चालन भएको उक्त प्रतियोगिताको समापन समारोह निर्देशनालयका निर्देशक उप–प्राध्यापक डा. दीपेन्द्र पराजुलीको अध्यक्षतामा सम्पन्न भयो ।

समापन समारोहका प्रमुख अतिथि नेपाल ओलम्पिक कमिटीका उपाध्यक्ष, नेपाल कराते महासंघका महासचिव तथा नेपाल कराते संघका अध्यक्ष श्री दावा गुरुङ रहनुभएको थियो । उहाँले विजेता खेलाडी तथा टिमहरूलाई पदक, ट्रफी तथा प्रमाणपत्र वितरण गर्नुभयो । प्रतियोगितामा उत्कृष्ट प्रदर्शन गर्दै रत्न राज्य क्याम्पसले ९ स्वर्ण र ५ रजत पदक प्राप्त गर्दै समग्रमा प्रथम स्थान हासिल गर्न सफल भएको छ भने महेन्द्ररत्न ताहाचल ५ स्वर्ण ४ रजत सहित दोश्रो भएको छ । विभिन्न क्याम्पसबीचको स्वस्थ प्रतिस्पर्धाले त्रिवि स्तरीय खेलकुदको स्तर र सम्भावनालाई उजागर गरेको आयोजकले जनाएको छ ।

उक्त प्रतियोगितामा त्रिविका ३८ वटा आङ्गिक क्याम्पसहरूको सहभागिता रहेको थियो । १०० भन्दा बढी स्वयंसेवक, ३८ व्यवस्थापक, १,३६८ जना खेलाडी विद्यार्थी खेलाडिहरू, १९० भन्दा बढि निर्णायक तथा प्राविधिक कर्मचारीहरू सहित कुल सहभागि संख्या १८५६ रहेको थियो । यस व्यापक सहभागिताका कारण त्रिवि उपकुलपति कप २०८२ विश्वविद्यालयस्तरीय खेलकुद इतिहासमा एक ऐतिहासिक र भव्य प्रतियोगिताका रूपमा स्थापित भएको छ । प्रतियोगितामा पाँच खेल विधा समावेश थिए जस मध्ये भलिबल (पुरुष/महिला) जावलाखेल भलिबल प्रशिक्षण केन्द्र, बास्केटबल (पुरुष/महिला, नयाँ विधा) दशरथ रंगशाला तथा मर्लियोन जिम्नेजियम, लाजिम्पाट, एथलेटिक्स (पुरुष/महिला) दशरथ रंगशाला, ब्याडमिन्टन (सिङ्गल/डबल) भूकम्प स्मृति डल्लु आवास बहुउद्देश्यीय कभर्ड हल र टेबल टेनिस (सिङ्गल/डबल) लैनचौर कभर्ड हलमा सम्पन्न भएको थियो ।

डा. पराजुलीले मन्तव्यमा प्रतियोगिताले क्याम्पसस्तरमै खेलाडी पहिचान, नेतृत्व विकास र खेल अनुशासन प्रवद्र्धनमा महत्वपूर्ण योगदान दिएको उल्लेख गर्नुभयो। उहाँका अनुसार, यस प्रतियोगिताबाट छनोट भएका खेलाडीहरूले आगामी राष्ट्रिय खेलकुद परिषद्द्वारा आयोजना हुने विश्वविद्यालयस्तरीय राष्ट्रिय खेलकुद प्रतियोगिता २०८२ (माघ २२–२३, काठमाडौं विश्वविद्यालय) मा त्रिविको प्रतिनिधित्व गर्नेछन् । त्यसै गरि ती खेलाडीहरु अन्य राष्ट्रिय तथा अन्तर्राष्ट्रिय प्रतियोगिताहरुमा भाग लिन योग्य हुनेछन् ।

समापन समारोहले त्रिवि उपकुलपति कपलाई केवल प्रतियोगिता मात्र नभई विश्वविद्यालयस्तरीय खेलकुद आन्दोलनको सशक्त आधारका रूपमा स्थापित गरेको आयोजकको निष्कर्ष रहेको छ ।

कीर्तिपुर, काठमाडौं । माघ १४, २०८२

त्रिभुवन विश्वविद्यालयद्वारा आयोजना गरिएको उपकुलपति कप राष्ट्रिय खेलकुद प्रतियोगिता २०८२ आज त्रिभुवन विश्वविद्यालय, कीर्तिपुर परिसरमा भव्य रूपमा उद्घाटन गरिएको छ । माघ १४ देखि १८ गतेसम्म सञ्चालन हुने उक्त प्रतियोगिता शिक्षाध्यक्षको कार्यालय, विद्यार्थी कल्याण तथा खेलकुद निर्देशनालयद्वारा आयोजना गरिएको हो ।

उद्घाटन समारोहको अध्यक्षता विद्यार्थी कल्याण तथा खेलकुद निर्देशनालयका निर्देशक उप–प्राध्यापक डा. दीपेन्द्र पराजुलीले गर्नुभएको थियो । समारोहको औपचारिक उद्घाटन त्रिभुवन विश्वविद्यालय सेवा आयोगका अध्यक्ष प्रा. डा. घनश्याम भट्टराईले ओलम्पिक ज्योतिको प्रतीकस्वरूप दियो प्रज्वलन गरी गर्नुभएको थियो । कार्यक्रमको सुरुवात सहभागी टोलीहरूको मार्चपास, राष्ट्रिय गान तथा खेलाडीहरूको शपथ ग्रहणबाट गरिएको थियो ।

कार्यक्रमलाई सम्बोधन गर्दै निर्देशक डा. पराजुलीले सहभागी खेलाडी, प्रशिक्षक, निर्णायक, अतिथि तथा सम्बन्धित सबै पक्षलाई स्वागत गर्दै प्रतियोगिताका उद्देश्य, खेलका प्रकार र सञ्चालन स्थलहरूबारे जानकारी गराउनुभयो । उहाँले निर्देशनालयले राष्ट्रिय सेवा दल, राष्ट्रिय सेवा योजना, विज्ञान प्रविधि नवप्रवर्तन उद्यमशिलता प्रवद्धन, र ललितकला तथा सृजनात्मक क्रियाकलापसम्बन्धी अतिरिक्त क्रियाकलापका कार्यक्रमहरूलाई विद्यार्थीहरूको शैक्षिक उपाधिमा अंक थप हुने गरी क्रेडिट–आधारित अवधारणा विकास गर्न लागिएको जानकारी दिनुभयो ।

उहाँले हालै सञ्चालनमा ल्याइएको विद्यार्थी, शिक्षक तथा कर्मचारीहरूको योगदानमा आधारित बृहद् स्वास्थ्य उपचार कार्यक्रम बारे पनि जानकारी गराउनुभयो । साथै, त्रिभुवन विश्वविद्यालयका विभिन्न संकायमा कार्यरत शिक्षक–अनुसन्धानकर्तामध्ये उल्लेख्य संख्या एल्सिभिएर र स्ट्यान्फोर्ड विश्वविद्यालयद्वारा सूचीकृत विश्वका शीर्ष २ प्रतिशत वैज्ञानिकहरूको सूचीमा समावेश रहेको तथ्य प्रस्तुत गर्दै विश्वविद्यालयको शैक्षिक क्षमता र अनुसन्धान प्रभावलाई उजागर गर्नुभयो ।

निर्देशक डा. पराजुलीका अनुसार यस प्रतियोगितामा विश्वविद्यालयका ३८ वटा आंगिक क्याम्पसबाट १,३४० जना विद्यार्थी खेलाडीहरू सहभागी भएका छन् भने २८० भन्दा बढी प्रशिक्षक, टोली व्यवस्थापक, निर्णायक तथा प्राविधिक जनशक्ति प्रतियोगितामा संलग्नताले यस प्रतियोगितालाई ऐतिहासिक बनाएको छ ।

उद्घाटन समारोहमा सांस्कृतिक कार्यक्रम (गायन तथा नृत्य) प्रस्तुत गरिनुका साथै खेल सामग्री हस्तान्तरण कार्यक्रम सम्पन्न गरिएको थियो । समारोहलाई सम्बोधन गर्दै प्रमुख अतिथि प्रा. डा. घनश्याम भट्टराईले यस स्तरको प्रतियोगिता आयोजना गर्न निर्देशनालयले खेलेको भूमिकाको प्रशंसा गर्दै प्रतियोगिता सफलताको शुभकामना व्यक्त गर्नुभयो ।

उद्घाटनपछि आज अपराह्न ३ः०० बजेपछि खेल प्रतियोगिताहरू सुरु भएका छन् । प्रतियोगितामा निम्न पाँच खेल समावेश गरिएका छन्ः

१.    भलिबल – जावलाखेल भलिबल प्रशिक्षण केन्द्र

२     बास्केटबल (यस वर्ष थप गरिएको खेल) – दशरथ रंगशाला

३.    एथलेटिक्स – दशरथ रंगशाला

४.    ब्याडमिन्टन – भूकम्प स्मृति डल्लु आवास बहुउद्देश्यीय कभर्ड हल

५.    टेबल टेनिस – लैनचौर कभर्ड हल

यस प्रतियोगिताबाट छनोट भएका खेलाडीहरू माघ २२–२३, २०८२ मा राष्ट्रिय खेलकुद परिषद्द्वारा काठमाडौंमा आयोजना हुने विश्वविद्यालयस्तरीय राष्ट्रिय खेलकुद प्रतियोगिता २०८२ मा त्रिभुवन विश्वविद्यालयको प्रतिनिधित्व गर्नेछन्। साथै, उत्कृष्ट खेलाडीहरू फिसुलगायत अन्तर्राष्ट्रिय विश्वविद्यालय खेलकुद प्रतियोगिताहरूमा सहभागिताका लागि योग्य हुनेछन् ।

त्रिभुवन विश्वविद्यालयको इतिहासमा पहिलोपटक विद्यार्थी कल्याण तथा खेलकुद निर्देशनालयको पहलमा विश्वविद्यालय परिसरमै यस स्तरको खेलकुद प्रतियोगिता उद्घाटन गरिएको हो, जसले विश्वविद्यालयको खेलकुद, स्वास्थ्य तथा समग्र विद्यार्थी विकासप्रतिको प्रतिबद्धतालाई स्पष्ट रूपमा उजागर गरेको छ ।

विद्यार्थी कल्याण तथा खेलकुद निर्देशनालय

त्रिभुवन विश्वविद्यालय, कीर्तिपुर

https://swsd.tu.edu.np/

निर्देशक डा. दीपेन्द्र पराजुलीको विशेष उपस्थितिमा आर.आर. क्याम्पसको खेलकुद तथा रचनात्मक सप्ताह समापन

त्रिभुवन विश्वविद्यालय अन्तर्गत स्ववियु आर.आर. क्याम्पसद्वारा आयोजित बृहत् खेलकुद तथा रचनात्मक सप्ताहको समापन समारोह विद्यार्थी कल्याण तथा खेलकुद निर्देशनालयका निर्देशक उप–प्रा. डा. दीपेन्द्र पराजुलीको विशेष उपस्थितिमा भव्य तथा सफल रूपमा सम्पन्न भएको छ।

समापन समारोहमा विशेष अतिथि का रूपमा सहभागी डा. पराजुलीले सरस्वती माताको विधिपूर्वक पूजाआजा गरी नव–आगन्तुक विद्यार्थीहरूलाई स्वागत गर्नुका साथै कार्यक्रमलाई सम्बोधन गर्नुभयो। उहाँले निर्देशनालयले विद्यार्थी, शिक्षक तथा कर्मचारीको समग्र हितलाई केन्द्रमा राखी दीर्घकालीन र नीतिगत पहलहरू अघि बढाइरहेको स्पष्ट पार्नुभयो।

डा. पराजुलीले त्रिभुवन विश्वविद्यालयमा योग्य, मेहनती र वास्तविक विद्यार्थीहरूको प्रवेश सुनिश्चित गर्ने दिशामा संस्थागत प्रयास भइरहेको उल्लेख गर्दै, त्यस्ता विद्यार्थीहरूको शैक्षिक तथा व्यक्तिगत विकासका लागि शिक्षकहरू पनि समयानुकूल अद्यावधिक, सक्रिय र उत्तरदायी हुनुपर्ने आवश्यकता औंल्याउनुभयो। उहाँले गुणस्तरीय विद्यार्थीका साथै उच्च प्रभाव पार्ने शिक्षक र अनुसन्धानकर्ताहरू नै विश्वविद्यालयको वास्तविक शक्ति हुने बताउनुभयो।

उहाँले त्रिभुवन विश्वविद्यालयमा कार्यरत धेरै प्राध्यापक तथा अनुसन्धानकर्ताहरू Elsevier र Stanford University द्वारा प्रकाशित विश्वका शीर्ष २ प्रतिशत वैज्ञानिकहरूको सूचीमा नेपालबाट सूचीकृत हुनु गौरवको विषय भएको उल्लेख गर्नुभयो। यसले त्रिभुवन विश्वविद्यालयको शिक्षण तथा अनुसन्धान क्षमताको अन्तर्राष्ट्रिय स्तरमा मान्यता स्थापित भएको उहाँको भनाइ थियो।

डा. पराजुलीले थप रूपमा त्रिभुवन विश्वविद्यालय विश्वमै सबैभन्दा बढी विद्यार्थी संख्या र अचल सम्पत्ति भएको विश्वविद्यालयहरूमध्ये अग्रस्थानमा रहेको उल्लेख गर्दै, यस्तो ठूलो संस्थालाई प्रभावकारी, उत्तरदायी र गुणस्तरीय रूपमा सञ्चालन गर्नु सबैको साझा दायित्व भएको बताउनुभयो।

उहाँले निर्देशनालयले NSS, NCC, VCC, ECA, SITE लगायतका कार्यक्रमहरूमा विद्यार्थीको सक्रिय सहभागिता, नियमित अनुगमन तथा मूल्याङ्कनको आधारमा पाठ्यक्रममा क्रेडिट प्रदान गर्ने नीति ल्याउने तयारी गरिरहेको जानकारी दिनुभयो। साथै, आ–आफ्नो तहमा उत्कृष्ट प्रदर्शन गर्ने प्रतिभाशाली विद्यार्थीहरूलाई देशमै रोकी सेवा गर्ने उद्देश्यसहित RA तथा TA जस्ता सुविधा सहित विशेष सहयोग कार्यक्रम सुरु गर्ने योजना रहेको पनि बताउनुभयो।

यसैक्रममा डा. पराजुलीले निर्देशनालयले हालै त्रिभुवन विश्वविद्यालयका विद्यार्थी, शिक्षक तथा कर्मचारीहरूका लागि योगदानमा आधारित कोष (Contributory Fund) मार्फत समग्र स्वास्थ्य उपचार (Comprehensive Health Treatment) सुविधा प्रदान गर्ने पहल प्रारम्भ गरिसकेको जानकारी गराउनुभयो। उक्त पहलले विश्वविद्यालय परिवारको स्वास्थ्य सुरक्षालाई व्यवस्थित र पहुँचयोग्य बनाउने अपेक्षा गरिएको उहाँको भनाइ थियो।

डा. पराजुलीले निर्देशनालयले हालै त्रिभुवन विश्वविद्यालयका सम्पूर्ण आङ्गिक क्याम्पसहरूमा Google Form मार्फत प्रतिक्रिया संकलन प्रक्रिया सुरु गरेको र आगामी नीतिहरू क्याम्पसहरूबाट प्राप्त सुझाव तथा आवश्यकता अनुरूप तय गरिने पनि स्पष्ट पार्नुभयो।

कार्यक्रममा त्रिभुवन विश्वविद्यालयका रेक्टर प्रा. डा. खड्ग के.सी. प्रमुख अतिथि का रूपमा सहभागी हुने कार्यक्रम रहेको भए तापनि विशेष कारणवश उहाँको उपस्थिति हुन सकेन। स्ववियु आर.आर. क्याम्पसका अध्यक्ष लोकेश कुमार खड्काको अध्यक्षतामा कार्यक्रम सम्पन्न भएको थियो।

उक्त समारोहसँगै अधिकांश क्याम्पसहरूमा सञ्चालन भएको खेलकुद सप्ताह सम्पन्न भई त्रिभुवन विश्वविद्यालय उपकुलपति कप २०८२ का लागि टिम छनोट प्रक्रिया पनि लगभग सम्पन्न भएको जानकारी दिइयो। उपकुलपति कप २०८२ माघ १४ गतेदेखि काठमाडौंमा सुरु हुने छ। सो प्रतियोगिताबाट छनोट भएका टिमहरूले माघ २२–२३ गते काठमाडौंमा राष्ट्रिय खेलकुद परिषद् द्वारा आयोजित राष्ट्रिय खेलकुद प्रतियोगितामा त्रिभुवन विश्वविद्यालयको प्रतिनिधित्व गर्नेछन्।

समापन समारोहलाई सफल बनाउन सहयोग पुर्‍याउनु हुने विद्यार्थी, प्राध्यापक, कर्मचारी, आयोजक टोली, स्वयंसेवक तथा उपस्थित सम्पूर्ण महानुभावहरूप्रति आयोजकले हार्दिक धन्यवाद तथा आभार व्यक्त गरेको छ। यस्ता रचनात्मक, शैक्षिक तथा खेलकुद–केन्द्रित कार्यक्रमहरूले क्याम्पसको समग्र शैक्षिक, सांस्कृतिक तथा सृजनात्मक विकासमा महत्वपूर्ण योगदान पुर्‍याउने विश्वास व्यक्त गरिएको छ।

बिराटनगर, २०८२ पुष १९ः आफ्ना शिक्षक, विद्यार्थी र कर्मचारीहरुको स्वास्थ्य सेवा सहजीकरणकालागि त्रिभुवन विश्वविद्यालय (त्रिवि)ले कोशी प्रदेश स्वास्थ्य मन्त्रालय र प्रदेशभरिका विभिन्न अस्पतालहरूसँग प्रदेश स्वास्थ्य मन्त्री माननीय भूपेन्द्र राईको उपस्थितिमा सम्झौता पत्रहरूमा हस्ताक्षर गरेको छ ।

यसले त्रिविका शिक्षक, कर्मचारी र विद्यार्थीहरूलाई यसको योगदानमा आधारित कल्याणकारी कोष योजनाअन्तर्गत स्वास्थ्य उपचार सेवा सहज पु¥याउने उद्देश्य राख्दछ । प्रदेशस्तरमा यस्तो ठूलो स्तरको पहिलो सहकार्य मानिएको यस कार्यक्रममा त्रिविका १२ वटा आंगिक क्याम्पस र प्रदेशका साना ठूला गरि ७ वटा अस्पतालहरू समेटिएका छन् । यस अघि त्रिविको विद्यार्थी कल्याण तथा खेलकुद निर्देशनालयले स्वास्थ्य शिक्षा र सेवा प्रवाहलाई बलियो बनाउने साझा लक्ष्य राखी, एकमुष्ट सम्झौता पत्र हस्ताक्षरको प्रक्रिया सुरु गर्न प्रदेश स्वास्थ्य मन्त्रालयलाई पत्राचार गरेको थियो जसमा कोशी प्रदेश स्वास्थ्य मन्त्रालय र सम्बन्धित अस्पतालहरू “प्रथम पक्ष“ र त्रिभुवन विश्वविद्यालय र यसका आंगिक अस्पतालहरू “दोस्रो पक्ष“ छन् ।

मुख्य समारोहमा त्रिभुवन विश्वविद्यालय र कोशी प्रदेश स्वास्थ्य मन्त्रालयबीचको सम्झौता पत्रमा हस्ताक्षर भयो । यसका लागि त्रिवितर्फका रजिष्ट्रार प्रा. डा. केदार रिजाल र विद्यार्थी कल्याण तथा खेलकुद निर्देशनालयका निर्देशक डा. दीपेन्द्र पराजुलीले हस्ताक्षर गरे भने प्रदेश स्वास्थ्य सचिव डा. यदुचन्द्र घिमिरे र उपसचिव निर्मल भट्टराईले मन्त्रालयको प्रतिनिधित्व गरे । त्यसलगत्तै, त्रिविका आंगीक क्याम्पसहरूले प्रदेश र स्थानीय सरकार मातहतका आ–आफ्ना नजिकैका अस्पतालहरूसँग प्रत्यक्ष रूपमा छुट्टाछुट्टै सम्झौता पत्रमा हस्ताक्षर गरे । साथै, कोशी अस्पताल, मोरङ्ग र बि.पी. कोइराला स्वास्थ्य विज्ञान प्रतिष्ठान (BPKIHS) धरान जस्ता प्रमुख स्वास्थ्य संस्थाहरूसँग पनि छुट्टै सम्झौता पत्रमा हस्ताक्षर भए । महेन्द्र बहुमुखी क्याम्पस, धरान BPKIHSसँग र धनकुटा बहुमुखी क्याम्पस, धनकुटा जिल्ला अस्पतालसँग यस अघि नै सम्झौता भईसकेको छ ।

कार्यक्रममा उपस्थित प्रदेश स्वास्थ्य मन्त्री माननीय भूपेन्द्र राईले यो साझेदारीलाई प्रदेशको स्वास्थ्य क्षेत्रमा मिलेको ठूलो उपलब्धि बताउँदै विश्वविद्यालय र स्वास्थ्य संस्थाहरूबीच यस्तो सहकार्य अझ विस्तार हुनुपर्ने बताए । त्रिविका रजिष्ट्रार प्रा. डा. केदार रिजालले भने, “मन्त्री ज्यूको उपस्थितिले यस कार्यक्रमलाई ठूलो बल मिलेको छ । यो हाम्रा शैक्षिक समुदायको कल्याण सुनिश्चित गर्न र प्रदेशमा शैक्षिक र स्वास्थ्य सेवा संस्थाहरूबीच सहकार्य बलियो बनाउने ठोस कदम हो ।” प्रदेश स्वास्थ्य सचिव डा. यदुचन्द्र घिमिरेले पनि मन्त्रीको नेतृत्वमा यस्ता नवीन पहलहरू अझ प्रभावकारी बन्ने विश्वास व्यक्त गरे । त्यस्तै डा. पराजुलीले त्यस विस्तृत सम्झौताको महत्वका बारे प्रकाश पारेका थिए ।

सम्झौता पत्र हस्ताक्षर अघि, त्रिविको केन्द्रीय टोलीले बाग्मती, मधेश र कोशी प्रदेशका आंगिक क्याम्पसहरूमा भएका परीक्षाहरूको अनुगमन गरेको थियो । सम्झौता पश्चात् रजिष्ट्रार, प्रा. डा. केदार रिजालले इ. अ. सं पूर्वाञ्चल क्याम्पस, धरानले सोही क्याम्पसमा आयोजना गरेको १७औं इ. अ. सं स्नातकोत्तर सम्मेलनको उद्घाटन गरेका थिए भने निर्देशक, डा. दीपेन्द्र पराजुलीले दुई दिने त्यो सम्मेलनमा विशेष अतिथिको रूपमा सहभागीता जनाए ।

Tribhuvan University’s Research Centre for Applied Science and Technology (RECAST) has been awarded a project under the Innovative Research Grant (IRG) scheme funded by the University Grants Commission (UGC) for the fiscal year 2080/81 (2023/24).

The Research Approval Agreement was successfully signed among the Principal Investigator, the Executive Director of the concerned research center, and the Research Directorate, and was formally handed over by Prof. Dr. Dipak Aryal, Vice-Chancellor of Tribhuvan University.

Dr. Deependra Parajuli, Principal Investigator from RECAST, will lead the project, which falls under the National Priority Areas identified for research funding. This initiative is expected to promote innovative research, strengthen academic outputs, and contribute to Nepal’s scientific development.

The Directorate expresses its heartfelt gratitude to the University Grants Commission and Tribhuvan University authorities for their support in facilitating this research initiative.

Nobel Laureate Prof. Dr. Takaaki Kajita Graces TU’s 51st Convocation